入廠

印象中, 應該第一次坐救護車入急症室.

尋日下晝運動會,
跑完4x100同4x400, 衝線之後,
全身冇力,
坐喺地下幾個字,
仍然回唔到氣, 氣喘, 塊面白哂,
對腳嘅肌肉攰到完全support唔到我企起身...

之後極勉強地起身,
行去觀眾席,
坐喺度抖,
仍然冇乜進展...

UE見到我個樣唔多妥,
即刻搵咗一個喺仁安做護士嘅姊妹嚟幫手.
之後佢丈夫都嚟幫手, 幫我慢慢回復.
開始抖到氣同順啲, 啲手手腳腳郁到, 冇之前咁眼花.

湛兄同堅兄扶我到門口等的士,
原本諗住返屋企,
不過等咗一陣都冇車,
之後有架救護車嚟咗,
原本用嚟接另一個弟兄...
其他人幫我截咗, 就去check check安全啲...

上咗車, 問咗一大輪野都未開車...

救護員問我使唔使聞氧氣, 我話唔使.
宜家諗返, 未試過, 唔知啲氧氣點噴出嚟嘅呢......

去到醫院, 冇乜人, 好快check完, 最後去咗canteen食嘢.
有UE, 有另一個入廠嘅弟兄同埋佢屋企人, 仲有銘堅一家.
朝早仲諗緊唔知夜晚去邊度食好... 宜家唔使諗...  :P

究竟點解會回唔到氣?
係咪因為湛兄臨時同我對調變咗我跑最尾一棒?  :D
定係因為起跑前幾分鐘我唔小心飲水濁親?  :P
其實應該係因為本身有咳, 食咗藥...
食咗抗生素 (Clamovid 625) 同埋化痰藥 (Bisolvon).
初時都唔為意,
直到個救護員問呢樣問嗰樣,
問到有食藥先至醒起.
佢話有啲人食完藥做運動, 就咁byebye, 真係大吉佢個利是.  :P

估唔到啲藥啲反應咁大, 減低咗我心肺功能.
其實跑完4x100都冇嘢,
之後跑埋4x400先至唔妥.

諗返都幾感恩,
身邊有好多天使,
幫我急救, 送我去醫院, 陪我等檢查, 關心問候等等.
當然仲有太太喺身邊.