給自己的生日禮物

原價 $1280,
因為係 sony prestige 會員,
呢件配件9折,
(有啲配件最多有85折)
(點解大大舊, 又唔算好平嘅耳筒都算係配件......)
加埋生日有 $100 電子現金券,
埋單 $1052.

2018

2017, 眨眼就過咗, 又虛度咗一年.
大時大節, 好似已經冇咩值得慶祝.
唔記得有咩令自己高興,
可能因為傷心事太泛濫.

我寧願係我病,
好過佢病.
我病, 我會柄埋自己, 食藥瞓覺等自己好返, "請勿騷擾";
佢病, 佢會發我脾氣, 將事情無限上綱, 唔理後果.
我寧願係我病,
好過佢病,
至少我個心會舒服啲.

退燒冇耐,
未病好都要玩到成點鐘至瞓,
又唔飲水,
又食pizza熱氣嘢,
之後又燒返,
真係因為之前個醫生廢, 啲藥廢?

以前啲醫生朋友都講過,
最緊要飲多啲水,
休息多啲,
病自然會好.
啲藥多數都只係撳住啲病徵,
自身嘅抵抗力都好重要.
樓下個醫生, 後生, 未夠老練,
俾啲藥只係啱啱好,
遇著個曳曳病人,
啲病菌死唔哂...
個病人覺得個醫生廢, 以後唔睇佢,
而醫生就少咗單生意.
反而卓健, 仁安嗰啲成熟老醫生, 一嚟就落重藥,
一係食完就攰到死, 等病人乖乖瞓覺;
一係就索性唔好煩, 出動特敏福, 抗生素,
乜都死鬼哂, 一了百了.
病人自我感覺良好, 醫生以後又有生意.
真係百貨應百客.

呢啲簡單道理,
common sense,
同一句說話,
我講就唔聽, 唔信,
人哋講就信到十足十,
真係嘥氣.
以往已經發生過好多次.

病, 真係令人唔舒服,
我年尾都病咗,
食咗兩輪藥至好返.
不過, 係咪我太好人, 冇乘機發爛渣.
言語傷害, 可以好hurt.
聖經講得好: 要勒住舌頭,
不過唔係人人做到.
有趣嘅係, 之後可以好似冇嘢發生過咁,
依然好似好興奮咁睇叱吒.

愛心銀行嘅saving唔知仲有幾多,
唔知仲可以撐幾耐,
唔知我會唔會爆發,
唔知我幾時會發癲.

新年願望... 太奢侈了.
冇乜大浪已經好好.

夢想係我想搵到我嘅夢想.

過去幾年生日,
其實都唔多 happy,
雖然收到好多 happy birthday message.
鬧交, 病, 鬱悶.
係囉, 究意慶祝啲乜呢.

做人越嚟越冇期望,
因為失望總是苦澀.