Friday, December 22, 2017

賣ip6s+

去返上次先達嗰間,
佢開$2200, 我還$2400,
最終$2300.
如果去dcfever放可能有二千五六,
不過可能又要搞一大輪,
廢事煩.

下次買機,
可能去返 apple store trade in 仲抵玩.

Monday, May 1, 2017

轉贈舊傢俬電器

屋企有啲傢俬電器唔要, 唔算新,
搬去垃圾站好似有啲浪費,
賣又唔係好值錢,
想免費轉送俾有需要人士,
所以post咗啲嘢喺fb一個二手group度.

不過過程都幾艱辛,
主要係因為有啲人話咗要, 約好咗,
最後又話唔要,
搞到我要問完一個又一個.

統計一下,
大部份有留言嘅人我都有send msg去,
總共send咗俾31個人,
8個冇回音,
3個甩底,
其他一係size唔啱 (喺個post本身已寫明size...),
一係日子唔啱,
一係就已經留咗俾其他人.

好多人淨係留言喺度"排" "排" "排"...
好似驚執輸咁,
實際覆佢又冇人應.

上嚟拎嘢嘅人, 多數都正常. ;)
有一個人, 托朋友嚟拎嘢, 事後send msg嚟多謝.
有啲唔該都冇句, 好似老馮, 欠咗佢咁.
有啲上嚟之前send msg好多嘢問, 好似好friendly咁, 嚟到唔多出聲, 判若兩人.

最勁係一個女人嚟搬床架!
初初以為佢有朋友未嚟,
原來佢係自己拆床,
拆咗一陣唔夠力,
幫佢擰咗幾粒螺絲,
然後一齊搬落去預先call咗嘅貨van...
佩服.

一次過見到唔同年齡層嘅人點待人接物,
有趣.

Thursday, April 20, 2017

洗冷氣機

上個月某日放工後想搵間水電舖洗冷氣機,
成個街市得返一間未收舖,

點知就中伏...

到咗約定時間唔見人, 遲到...

清洗途中要推啲窗口機返舖洗,
隔咗幾粒鐘至返,
唔知係咪另外做咗幾單生意...

終於洗埋分體式... 但係著唔返......
師傅話部機舊, 電線老化......
佢話搵另一個師傅嚟整, 我問佢使唔使錢, 佢話要...
佢仲劃清界線, 話"我淨係洗冷氣", 言下之意係壞唔壞唔關佢事...

成日都要等佢覆電話, 愛理不理咁.


之後再上去睇, 影咗冷氣機情況啲相俾維修冷氣機嘅師傅睇,
話零件接觸不良, 老化, 如果維修可能整完呢樣壞另一樣, 所以唔建議整.

跟住佢話如果搵佢換冷氣機, 可以平少少, 我問平幾多, 佢話要睇牌子型號.

俾咗型號佢, 過咗成個禮拜, 再追, 終於肯報價, $13800...
正常電器舖都只係開價1萬...

佢明顯唔想做, 淨係識hea我.

唔會再幫襯毅豐.